कोण खोटे बोलतोय?

सरकार बनू शकलेले नाही, कारण ज्या महायुतीला जनतेने कौल दिलाय, त्यातल्या दोन प्रमुख पक्षात टोकाची भांडणे सुरू आहेत. लोकसभेच्या वेळी युती करताना भाजपाने दिलेला शब्द पाळला नाही, असा आरोप करून सेनेने भाजपाला खोटे पाडलेले आहे. अगदी जाहिरपणे वारंवार सेनेचे नेते खोटेपणाचा आरोप करीत आहेत. उलट असे काही ठरलेलेच नव्हते, असे म्हणून भाजपाने हात झटकले. तर पक्षप्रमुखांनी आपल्याला भाजपा खोटा ठरवित असल्याचा संताप व्यक्त केला आहे. खोटे बोलणारी आपली अवलाद नाही, असेही म्हटलेले आहे. त्यामुळे उद्धव ठाकरे यांच्यावर विश्वास ठेवायला हरकत नाही. ते खरेच बोलत आहेत, हे मान्य करूनही एक प्रश्न शिल्लक उरतो आणि त्याचे उत्तर सेनेकडून मिळालेच पाहिजे. भाजपा खोटारडा आहे, हे सेनेला कधी कळले? जेव्हा कळले, तेव्हाच त्यांनी जगासमोर भाजपाचा खोटेपणा उघड कशाला केला नव्हता? भाजपाने मुख्यमंत्रीपद व सत्ता अर्धी अर्धी वाटून घेण्याचे मान्य केलेले असेल, तर भाजपा, देवेंद्र फ़डणवीस, नरेंद्र मोदी वा अमित शहा कधीपासून खोटे बोलत होते? ते २४ आक्टोबरला खोटे बोलू लागले का? निकालानंतर भाजपाचा खोटेपणा सुरू झाला का? नसेल वा आधीच खोटेपणा सुरू झाला असेल, तर त्याला तात्काळ चव्हाट्यावर आणुन भाजपाचे वस्त्रहरण करण्याची जबाबदारी कोणाची होती? ज्यांच्यात तशी बोलणी झाली आणि ज्यांना शब्द दिला गेला होता, त्यांनीच त्याचा गौप्यस्फ़ोट खोटेपणा सुरू होताच करायला नको काय? तसे केले असते तर भाजपाला खुद्द मतदारानेच धडा शिकवला असता. कारण मतदाराचीही यात फ़सवणूक झालेली आहे. महायुतीला बहूमत देणार्‍या मतदाराची त्यात फ़सगत झाली ना? त्याचे कारण काय? कोणामुळे त्या महायुतीच्या मतदाराची फ़सगत होऊन गेली आहे? एक खोटा बोलत होता आणि दुसर्‍याने त्याला वेळीच रोखले नाही वा उघडे पाडले नाही, म्हणून मतदाराची दिशाभूल झालेली नाही काय? त्यासाठी दोषी कोण आहे?

मुख्यमंत्री आमचाच हा भाजपाचा दावा २४ आक्टोबरला निकाल लागल्यानंतरचा नाही. देवेंद्र फ़डणवीस यांची महाजनादेश यात्रा १ ऑगस्टपासून सुरू झाली. तेव्हापासून त्यांच्या प्रचारात प्रत्येक दिवशी त्यांनी व त्यांच्यासमवेत असलेल्या प्रत्येक भाजपा नेत्याने भाजपाचा मुख्यमंत्री, असाच एक सुर आळवलेला होता व प्रचाराचा रोख ठेवलेला होता. देशाचे पंतप्रधान नरेंद्र मोदी, गृहमंत्री व भाजपाचे अध्यक्ष अमित शहा यांनीही सातत्याने त्याचाच उच्चार केलेला होता. भाजपाच्या सर्व प्रचार साहित्यामध्ये मुख्यमंत्रीपदाचा दावेदार म्हणून फ़डणवीस यांना राजरोस पेश केले जात होते. अगदी महायुतीचा दावेदार म्हणूनच पेश केले जात होते. हा सगळा धडधडीत खोटेपणा नव्हता काय? बंद दरवाज्याआड ह्या गोष्टी चालल्या नव्हत्या. अगदी राजरोस सभांमध्ये, जाहिराती व प्रचार साहित्यामध्ये त्याचे पुरावे सापडू शकतात, उपलब्धही आहेत. सामान्य जनतेच्या साक्षीने सर्वकाही चालले होते. मग शिवसेनेला त्याची गंधवार्ता नव्हती काय? याविषयात विचारणा झालेली होती आणि त्या प्रत्येकवेळी पक्षप्रमुख उद्धव ठाकरे यांनी ‘आमचं ठरलंय’ असेच उत्तर दिलेले होते. अगदी जागावाटप घोषित झाल्यावर देखील खोचक प्रश्न विचारले गेले होते. पण केव्हाही पक्षप्रमुख किंवा सेनेच्या कुणा प्रवक्त्याने देवेंद्र यांच्या मुख्यमंत्रीपदाच्या दाव्याला खोटेपणा म्हणून जाहिर केले नव्हते, की आक्षेप घेतला नव्हता. सहाजिकच ज्यांनी महायुतीला मते दिली, त्यांच्यासाठी मुख्यमंत्रीपदाचा जाहिरपणे एकच दावेदार होता आणि एकच नाव होते. कारण त्याला दुसर्‍या पक्षाने म्हणजे शिवसेनेने एकदाही आक्षेप घेतला नव्हता. किंबहूना तो निव्वळ खोटेपणा असल्याचे सत्यही जनतेला कळू दिले नव्हते. युतीला मते देणार्‍या सामान्य मतदाराची ही दिशाभूल नव्हती काय? भाजपाचा खोटेपणा चालला होता आणि तो खोटेपणा झाकून ठेवण्याला शिवसेनेने हातभार लावलेला नाही काय? २४ आक्टोबरला तो खोटेपणा असल्याचे सेनेच्या प्रवक्त्यांना उमगले काय?

मुद्दा इतकाच, की बंद दरवाजाआड काय ठरवले गेले वा शिजले, हे सामान्य लोकांना ठाऊक नाही. ते ठाऊक असलेल्या दोनतीन व्यक्ती आहेत. सहाजिकच तिथे हजर असलेल्यापैकी एक कोणी खोटेपणा करीत असेल, तर त्याला तात्काळ खोटा पाडणे,.ही उरलेल्यांची जबाबदारी असते. तसे न करणे म्हणजे त्याच्या खोटेपणाला पाठीशी घालण्याचा गुन्हाच असतो. कुठल्याही गुन्हाची माहिती असताना ती लपवून गुन्ह्याला पाठीशी घालणे देखील सारखाच गुन्हा असतो. कारण भाजपा असो किवा शिवसेना असो, दोघेही लोकशाहीतील पक्ष असून, जनतेला सामोरे जांणारे पक्ष आहेत. जनतेची दिशाभूल होत असेल वा कोणी करीत असेल, तर त्याबाबतीत सामान्य जनतेला जागरूक करणे; ही प्रत्येकाची जबाबदारी सारखीच आहे ना? मग भाजपाचा खोटेपणा १ ऑगस्टला सुरू झाला, तेव्हापासून २४ आक्टोबरपर्यंत शिवसेनेने त्याविषयी मौन कशाला बाळगले? त्यातून जनतेची म्हणजे मतदाराची फ़सवणूक कशाला होऊ दिली? भाजपाला तर खोटेपणा करून मतदार व शिवसेनेला फ़सवायचेच होते. पण आपली व सामान्य जनतेची फ़सवणूक होत असताना शिवसेना निमूट कशाला सोसत होती? कारण त्याच कालखंडात सेनाही प्रचारात उतरली होती आणि रान उठवित होती. मग भाजपाच्या किंवा फ़डणवीसांच्या खोटेपणावर पांघरूण घालण्याचे प्रयोजन काय होते? कारण त्यात सामान्य मतदाराची पण दिशाभूल झाली आहे. भाजपाला किंवा महायुतीला मत देऊन मतदार गंडवला गेला आहे. एकाने फ़सवले आहे आणि दुसर्‍याने हा खोटेपणा चालल्याचे माहिती असूनही मतदाराला अंधारात ठेवलेले आहे. भाजपाने शिवसेनेला फ़सवले हा दावा मान्य केला, तरी सेनेनेही सामान्य जनता व महायुतीच्या मतदाराची फ़सवणूकच केली ना? त्यांच्या गळ्यात एक फ़सवणूक करणारा मित्रपक्ष बांधला ना? त्याला प्रामाणिकपणा म्हणता येईल काय? लोकशाही पक्षांपुरती मर्यादित नसते, जनतेशी संबंधित असते.

अमित शहा किंवा भाजपा नेत्यांनी बंद दरवाजाआड कोणाला काय आश्वासन दिले वा कबुल केले, त्याचा कोणी साक्षिदार नाही. पण १ ऑगस्टला महाजनादेश यात्रा सुरू केल्यापासून देवेंद्र व भाजपा नेते न ठरलेल्या युतीच्या मसूद्यासाठी मतदाराला आवाहन जाहिरपणे करीत होते. त्यांना शिवसेनेने कधीच व कुठेही रोखले नाही, ही जगासमोरची वस्तुस्थिती आहे. उद्धवराव खरे बोलत असतील, तर भाजपावाले मतदाराला खोटेच काही सांगून आपलाच मुख्यमंत्री म्हणजे महायुतीचा सांगत पेश करत होते. पण हे खोटे लपवले कोणी? अमित शहा, देवेंद्र यांनी नव्हेतर सेनेने लपवलेले ते खोटे आहे. करार तसा झाला नसेल वा तसे काही ठरलेले नसेल, तर प्रचाराच्या दरम्यान भाजपाला जगासमोर खोटा पाडण्याची मोठी जबाबदारी शिवसेनेची नव्हती काय? ती टाळणे म्हणजेही खोटेपणाच नाही काय? निकाल लागण्यापर्यंत थांबून वा खोटेपणाला पाठीशी घालून झाल्यावर आता शिवसेनेने आपण त्या गावचेच नाही, म्हणण्यात अर्थ नाही. त्यांनी आधीच हा गौप्यस्फ़ोट केला असता, तर खोटारड्या भाजपाला अधिक जागा देण्यापेक्षा मतदाराने अन्य पक्षांना प्रतिसाद दिला असता. कदाचित राष्ट्रवादी व कॉग्रेसला किंवा मनसे वंचितला मतदाराने प्रतिसाद दिला असता. खोट्यापेक्षा दुबळाही चांगला असाही कौल मिळू शकला असता. पण उद्धवराव किंवा त्यांच्या चाणक्यांचे दावे मानायचे तर भाजपाने खोटेपणा केलेला आहे आणि त्यांचा खोटेपणा जनतेच्या गळी उतरवण्यास शिवसेनेनेच हातभार लावलेला आहे. आज जे सत्य शिवसेना तावातावाने कथन करते आहे, ते आधीच्या दोनअडीच महिनात बोलायला कोणी रोखलेले होते? की दोघांना मतदाराशी खोटेपणा करून आमदार पदरात पाडून घ्यायचे होते? म्हणून संगनमताने दोघांनी सामान्य मतदाराची फ़सवणूक केली का? एकदा आमदार खात्यात जमा झाल्यावर परस्परांना खोटे ठरवण्याची स्पर्धा रंगलेली आहे काय? कोण खोटे बोलतोय? जनतेनेच आपापला निष्कर्ष काढावा.